Vendime të miratuara në mbledhjen e Këshillit të Ministrave, datë 7 Shtator 2022:
V E N D I M
PËR
EKZEKUTIMIN E VENDIMIT TË GJYKATËS EVROPIANE PËR TË DREJTAT E NJERIUT, DATË 14.6.2022, PËR ÇËSHTJEN “BALKASI DHE TË TJERË KUNDËR SHQIPËRISË” (KËRKESA NR.14800/18)
Në mbështetje të nenit 100 të Kushtetutës, të nenit 46, të Konventës Evropiane për Mbrojtjen e të Drejtave të Njeriut dhe Lirive Themelore, ratifikuar me ligjin nr.8137, datë 31.7.1996, “Për ratifikimin e Konventës Evropiane për Mbrojtjen e të Drejtave të Njeriut dhe Lirive Themelore”, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 14, të ligjit nr.115/2021, “Për buxhetin e vitit 2022”, të ndryshuar, me propozimin e Zëvendëskryeministrit, Këshilli i Ministrave
V E N D O S I:
1. Ekzekutimin e vendimit të Gjykatës Evropiane për të Drejtat e Njeriut, datë 14.6.2022, për çështjen “Balkasi dhe të tjerë kundër Shqipërisë”, kërkesa nr.14800/18, përfundimtar në datën 14.6.2022, në shumën totale 13 500 (trembëdhjetë mijë e pesëqind) euro në lidhje me dëmin jopasuror, plus çdo taksë që mund të jetë e aplikueshme.
2. Vlera e përcaktuar si detyrim në pikën 1, të këtij vendimi, të konvertohet në lekë, në bazë të kursit të këmbimit të bankës ku depozitohen shumat, në datën e kryerjes së pagesës.
3. Vlera e përcaktuar si detyrim, në pikën 1, të këtij vendimi, të depozitohet në një nga bankat e nivelit të dytë, në emër të kërkuesit të dytë z. Besnik Alushi, kërkuesit të tretë z. Nikollaq Alushi dhe kërkuesit të pestë z. Panajot Alushi, në vlerën 4 500 (katër mijë e pesëqind) euro secili, që shteti shqiptar detyrohet, sipas vendimit përfundimtar të Gjykatës Evropiane për të Drejtat e Njeriut, datë 14.6.2022, dhe të paguhet në llogarinë bankare të Shërbimit Ligjor Falas Tiranë.
4. Pagimi i shumës së depozituar, sipas përcaktimeve në pikën 3, të këtij vendimi, në llogarinë bankare të Shërbimit Ligjor Falas Tiranë, të bëhet nga Ministria e Financave dhe Ekonomisë, pas paraqitjes së dokumentacionit të nevojshëm ligjor për kryerjen e pagesave nga buxheti i shtetit, brenda afatit 3-mujor, nga dita kur vendimi i Gjykatës është bërë përfundimtar.
5. Në rast mospagimi brenda afatit 3-mujor, të përmendur në pikën 4, të këtij vendimi, mbi shumën e përmendur paguhen interesa të thjeshta të barabarta me kursin marzhinal të huas së Bankës Qendrore Evropiane, gjatë periudhës së mospagimit, plus 3%.
6. Efektet financiare, të parashikuara për ekzekutimin e këtij vendimi të përballohen nga fondi rezervë i buxhetit të shtetit për vitin 2022.
7. Ngarkohet Ministria e Financave dhe Ekonomisë për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
EMËRIMIN NË DETYRË TË DREJTORIT TË PËRGJITHSHËM TË POLICISË SË SHTETIT
Në mbështetje të nenit 100 të Kushtetutës dhe të pikës 1, të nenit 13, të ligjit nr.108/2014, “Për Policinë e Shtetit”, të ndryshuar, me propozimin e ministrit të Brendshëm, Këshilli i Ministrave
V E N D O S I:
Z. Muhamet Rrumbullaku emërohet drejtor i Përgjithshëm i Policisë së Shtetit dhe i jepet grada “Drejtues Madhor”.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
DHËNIEN E MIRATIMIT PËR LIDHJEN E KONTRATËS SË QIRASË, ME TARIFËN 1 EURO/KONTRATA, NDËRMJET MINISTRISË SË FINANCAVE DHE EKONOMISË, SI QIRADHËNËS, DHE SHOQËRISË “WHITE ROADS HOTEL”, SH.P.K., ME NUIS M02407023J, SI QIRAMARRËS, TË PRONAVE TË PALUAJTSHME SHTETËRORE NË ZONËN KADASTRALE 1739, BASHKIA HIMARË, PJESË E FONDIT TË PASURIVE TË PALUAJTSHME PËR MBËSHTETJEN E INVESTIMEVE STRATEGJIKE
Në mbështetje të nenit 100 të Kushtetutës, të nenit 5, të aktit normativ nr.4, datë 9.7.2008, të Këshillit të Ministrave, “Për privatizimin dhe dhënien në përdorim shoqërive tregtare dhe institucioneve shtetërore të ndërmarrjeve apo objekteve të veçanta, mjeteve kryesore dhe mjeteve të xhiros së këtyre ndërmarrjeve”, miratuar me ligjin nr.9967, datë 24.7.2008, të ndryshuar, dhe të kreut V, të vendimit nr.54, datë 5.2.2014, të Këshillit të Ministrave, “Për përcaktimin e kritereve, të procedurës e të mënyrës së dhënies me qira, enfiteozë apo kontrata të tjera të pasurisë shtetërore”, të ndryshuar, me propozimin e ministrit të Financave dhe Ekonomisë, Këshilli i Ministrave
V E N D O S I:
1. Dhënien e miratimit për lidhjen e kontratës së qirasë, me tarifën 1 (një) euro/kontrata, ndërmjet Ministrisë së Financave dhe Ekonomisë, si qiradhënës, dhe shoqërisë “WHITE ROADS HOTEL”, sh.p.k., me NUIS M02407023J, si qiramarrës, për pronat e paluajtshme shtetërore në zonën kadastrale 1739, me numër pasurie 68/122, 5240/5 dhe 68/51/2, të llojit “truall”, me sipërfaqe totale 9 157.2 m2 (nëntë mijë e njëqind e pesëdhjetë e shtatë pikë dy), në pronësi “shtet”, me vendndodhje në Gjilekë, Bashkia Himarë, pjesë e fondit të pasurive të paluajtshme për mbështetjen e investimeve strategjike, sipas dokumentacionit të pronësisë, planvendosjes, dhe tekstit të projektkontratës, që i bashkëlidhen këtij vendimi.
2. Ngarkohen Ministria e Financave dhe Ekonomisë, Agjencia Shqiptare e Zhvillimit të Investimeve, Agjencia Shtetërore e Kadastrës, Drejtoria Vendore Vlorë, dhe shoqëria “WHITE ROADS HOTEL”, sh.p.k., për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
MIRATIMIN E MEMORANDUMIT TË MIRËKUPTIMIT, NDËRMJET KËSHILLIT TË MINISTRAVE TË REPUBLIKËS SË SHQIPËRISË DHE FONDACIONIT SHQIPTARO-AMERIKAN PËR ZHVILLIM PËR ZBATIMIN E PROJEKTIT “ELEMENT IT”
Në mbështetje të nenit 100 të Kushtetutës, të nenit 39, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, dhe të nenit 19, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit të Financave dhe Ekonomisë dhe ministrit të Shtetit për Rininë dhe Fëmijët, Këshilli i Ministrave
V E N D O S I:
Miratimin e memorandumit të mirëkuptimit, ndërmjet Këshillit të Ministrave të Republikës së Shqipërisë dhe Fondacionit Shqiptaro-Amerikan për Zhvillim (AADF) për zbatimin e projektit “Element IT”, sipas tekstit që i bashkëlidhet këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
NJË NDRYSHIM NË VENDIMIN NR.199, DATË 10.4.2019, TË KËSHILLIT TË MINISTRAVE, “PËR PËRCAKTIMIN E KRYETARIT DHE EMËRIMIN E ANËTARËVE, PËRFAQËSUES TË PUSHTETIT QENDROR, NË KËSHILLIN DREJTUES TË FONDIT SHQIPTAR TË ZHVILLIMIT”, TË NDRYSHUAR
Në mbështetje të nenit 100 të Kushtetutës dhe të nenit 10, të ligjit nr.10130, datë 11.5.2009, “Për Fondin Shqiptar të Zhvillimit”, të ndryshuar, me propozimin e Kryeministrit, Këshilli i Ministrave
V E N D O S I:
Në pikën 1, të vendimit nr.199, datë 10.4.2019, të Këshillit të Ministrave, të ndryshuar, z. Arben Ahmetaj, Zëvendëskryeministër, zëvendësohet me znj. Belinda Balluku, Zëvendëskryeministër.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
DISA NDRYSHIME DHE SHTESA NË VENDIMIN NR.187, DATË 8.3.2017, TË KËSHILLIT TË MINISTRAVE, “PËR MIRATIMIN E STRUKTURËS DHE TË NIVELEVE TË PAGAVE TË NËPUNËSVE CIVILË/NËPUNËSVE, ZËVENDËSMINISTRIT DHE NËPUNËSVE TË KABINETEVE NË DISA INSTITUCIONE TË ADMINISTRATËS PUBLIKE”, TË NDRYSHUAR
Në mbështetje të nenit 100 të Kushtetutës, të pikës 2, të nenit 4, të ligjit nr.10405, datë 24.3.2011, “Për kompetencat për caktimin e pagave dhe të shpërblimeve”, të pikës 2, të nenit 7, të ligjit nr.152/2013, “Për nëpunësin civil”, të ndryshuar, dhe të ligjit nr.9584, datë 17.7.2006, “Për pagat, strukturat dhe shpërblimet e institucioneve të pavarura kushtetuese dhe institucioneve të tjera të pavarura, të krijuara me ligj”, të ndryshuar, me propozimin e Kryeministrit, Këshilli i Ministrave
V E N D O S I:
1. Në vendimin nr.187, datë 8.3.2017, të Këshillit të Ministrave, të ndryshuar, bëhen këto ndryshime dhe shtesa:
a) Në pikën 1/3 bëhen ndryshimi dhe shtesa e mëposhtme:
i. Në shkronjën “a” shtohen emërtesat “Drejtoria e Përgjithshme e Akreditimit”, “Agjencia Kombëtare e Mjedisit” dhe “Agjencia Kombëtare e Zonave të Mbrojtura”;
ii. Në shkronjën “b”, emërtesat “Drejtoria e Akreditimit”, “Agjencia Kombëtare e Mjedisit” dhe “Agjencia Kombëtare e Zonave të Mbrojtura” shfuqizohen.
b) Pas pikës 4/20 shtohet pika 4/21, me këtë përmbajtje:
“4/21. Në Drejtorinë e Sigurimit të Informacionit të Klasifikuar, “titullari i institucionit” dhe nëpunësit në njësitë teknike të përmbajtjes, në masën 20 000 (njëzet mijë) lekë në muaj.”.
c) Në pikën 6, pas paragrafit, që përcakton pagesat për këshilltarët e jashtëm dhe ndihmësit e jashtëm të Kryeministrit, shtohet paragrafi, me këtë përmbajtje:
“Përjashtimisht, Kryeministri ka të drejtë të angazhojë si këshilltarë të jashtëm edhe shtetas të huaj, ekspertë/konsulentë të njohur ndërkombëtarisht, me një pagesë jo më shumë sesa 1 000 000 (një milion) lekë në muaj, për një periudhë angazhimi jo më shumë se sa kohëzgjatja e mandatit të tij.”.
ç) Në rreshtin e tretë të lidhjes nr.6, pas emërtesës “Drejtor drejtorie në drejtoritë e përmbajtjes në Agjencinë Kombëtare të Kërkimit Shkencor dhe Inovacionit” shtohen emërtesat “Drejtor drejtorie në drejtoritë e përmbajtjes në Agjencinë Kombëtare të Mjedisit, në nivel qendror” dhe “Drejtor drejtorie në drejtoritë e përmbajtjes në Agjencinë Kombëtare të Zonave të Mbrojtura.”.
d) Në lidhjen nr.9, përpara rreshtit
Titullar i institucionit rajonal.
…….. III-b 1
shtohet rreshti, me këtë përmbajtje:
Titullar i agjencive rajonale të mjedisit. III-a/1 1
2. Efektet financiare, që rrjedhin nga zbatimi i këtij vendimi për vitin 2022, për:
a) Kryeministrinë dhe Drejtorinë e Sigurimit të Informacionit të Klasifikuar të përballohen nga fondet e miratuara për secilin institucion për këtë vit dhe të fillojnë pas hyrjes në fuqi të këtij vendimi;
b) të gjitha parashikimet e tjera të përballohen nga fondet e miratuara për këtë vit për secilin institucion dhe të fillojnë në momentin e emërimit apo transferimit të nëpunësve në strukturat dhe organikat e reja.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
MËNYRËN E MBAJTJES SË REGJISTRIT QENDROR TË KËRKESAVE PËR VËNIE NË EKZEKUTIM TË URDHRAVE TË EKZEKUTIMIT DHE NDËRVEPRIMIT ME BAZAT E TJERA TË TË DHËNAVE SHTETËRORE
Në mbështetje të nenit 100 të Kushtetutës, të nenit 516/a, të Kodit të Procedurës Civile, të nenit 4, të ligjit nr.10325, datë 23.9.2010, “Për bazat e të dhënave shtetërore”, të nenit 26, të ligjit nr.8730, datë 18.1.2001, “Për organizimin dhe funksionimin e Shërbimit të Përmbarimit Gjyqësor”, të ndryshuar, dhe të pikës 3, të nenit 24, të ligjit nr.26/2019, “Për Shërbimin Përmbarimor Gjyqësor Privat”, me propozimin e ministrit të Drejtësisë, Këshilli i Ministrave
V E N D O S I:
1. Regjistri qendror i kërkesave për vënien në ekzekutim të urdhrave të ekzekutimit, i krijuar si baza e të dhënave shtetërore “Sistemi i Menaxhimit Elektronik të Çështjeve të Përmbarimit Gjyqësor” (ALBIS) funksionon, mbahet dhe ndërvepron me bazat e tjera të të dhënave shtetërore, në përputhje me rregullat e caktuara në këtë vendim.
2. Baza e të dhënave shtetërore ALBIS përmban:
a) të dhënat e regjistrave të çështjeve përmbarimore aktive dhe/ose të pezulluara, të regjistruara deri në datën e hyrjes në fuqi të këtij vendimi, si dhe të çështjeve përmbarimore të reja, që paraqiten për ekzekutim pas hyrjes në fuqi të këtij vendimi;
b) të dhënat e regjistrave të çështjeve përmbarimore të pushuara, të arkivuara ose të transferuara, të regjistruara nga përmbaruesit gjyqësorë deri në datën e hyrjes në fuqi të këtij vendimi;
c) të dhënat e regjistruara në sistem nga përmbaruesit gjyqësorë, sipas numrit të protokollit të librit të përmbaruesit gjyqësor ose zyrës/shoqërisë përmbarimore për dokumentet procedurale, vendimet, urdhrat e ekzekutimit apo të dhënat që lidhen me çështjen dhe palët në procesin e ekzekutimit;
ç) informacion për procesin ekzekutues të çështjes përmbarimore të përmbaruesit, i cili paraqitet kur kërkohet nga strukturat që kanë të drejtën e aksesit në sistem.
3. Të dhënat që përmban baza e të dhënave shtetërore ALBIS ndahen në të dhëna parësore dhe të dhëna dytësore.
4. Të dhëna parësore konsiderohen të dhënat e mbledhura në këtë bazë të dhënash dhe që kanë të bëjnë me:
a) të dhëna për çështjet përmbarimore dhe përshkrime për ekzekutimin e tyre (numri i çështjes, numri i vjetër i çështjes, zyra e përmbarimit/përmbaruesi privat, numri i protokollit, data e regjistrimit të çështjes, kreditori, debitori, lloji i detyrimit dhe lloji i taksës ose tarifës);
b) fazën procedurale të procesit përmbarimor, referuar dokumenteve të përmbaruesit gjyqësor gjatë veprimtarisë së tij, të regjistruara në sistem (data dhe numri i protokollit të kërkesës, statusi i çështjes, transferimet e çështjeve përmbarimore, data e fillimit të ekzekutimit, komunikimi ndërinstitucional shkresor i çdo çështjeje përmbarimore, informacion mbi procesin ekzekutues nga përmbaruesi gjyqësor dhe komente).
5. Të dhëna dytësore konsiderohen të dhënat e siguruara nga ndërveprimi me baza të tjera të të dhënave shtetërore dhe kanë të bëjnë me:
a) të dhënat identifikuese të qytetarëve;
b) të dhëna identifikuese të subjekteve;
c) të dhëna të pasurive të paluajtshme;
ç) të dhëna të mjeteve;
d) të dhëna të vendimeve gjyqësore.
6. Baza e të dhënave ALBIS ndërvepron me bazat e tjera të të dhënave shtetërore për marrjen e të dhënave, si më poshtë vijon:
a) Nga Regjistri Kombëtar i Zyrës së Gjendjes Civile merr të dhënat e mëposhtme:
i. Emrin, atësinë dhe mbiemrin;
ii. Numrin personal të identifikimit;
iii. Adresën e banimit;
iv. Qytetin;
iii. Shtetin;
iv. Vdekjen.
b) Nga Regjistri Tregtar i QKB-së merr të dhënat e mëposhtme:
i. Emërtimin e subjektit;
ii. Tipin e subjektit;
iii. NIPT-in;
iv. Adresën e selisë së subjektit ose ushtrimit të aktivitetit;
v. Kodin postar;
vi. Qytetin;
vii. Shtetin;
c) Nga Regjistri Elektronik i Pasurive të Paluajtshme merr të dhënat e mëposhtme:
i. Numrin e pasurisë;
ii. Numrin e zonës kadastrale;
iii. Të dhëna të volumit dhe të faqes, të shënuara në kartelë;
iv. Llojin e pasurisë;
v. Të dhëna mbi pronësinë e pasurisë së paluajtshme;
vi. Gjendjen juridike të pasurisë;
ç) Nga Regjistri Kombëtar i Mjeteve merr të dhënat e mëposhtme:
i. Targën e mjetit;
ii. Numrin e shasisë;
iii. Të dhëna të mjetit (lloji, marka, modeli, tipi, karroceria, ngjyra, numri i dyerve, lënda djegëse, fuqia, cilindrata, viti i prodhimit, numri i vendeve);
iv. Llojin e përdorimit;
v. Të dhëna mbi pronësinë e mjetit;
vi. Gjendjen juridike të mjetit (sanksione e detyrime administrative të vendosura nga Drejtoria e Përgjithshme e Shërbimeve të Transportit Rrugor);
d) Nga Sistemi Elektronik i Regjistrimit të Çështjeve Gjyqësore merr të dhënat e mëposhtme:
i. Numrin dhe datën e urdhrit të ekzekutimit;
ii. Numrin dhe datën e vendimit të gjykatës;
iii. Objektin.
7. Ndërveprimi i bazës së të dhënave shtetërore ALBIS me bazat e tjera të të dhënave shtetërore kryhet në përputhje me rregullat e parashikuara nga legjislacioni në fuqi për bazat e të dhënave shtetërore.
8. Subjektet përgjegjëse të bazës së të dhënave shtetërore ALBIS janë, si më poshtë vijon:
a) Institucioni administrues është Ministria e Drejtësisë;
b) Dhënës të informacionit janë:
i. Drejtoria e Përgjithshme e Përmbarimit;
ii. zyrat vendore të përmbarimit gjyqësor shtetëror nëpërmjet përmbaruesve gjyqësorë shtetërorë;
iii. Dhoma Kombëtare e Përmbaruesve Gjyqësorë Privatë;
iv. përmbaruesit gjyqësorë privatë.
9. Niveli i aksesit në bazën e të dhënave ALBIS është, si më poshtë vijon:
a) Administratori ka të drejtat e administrimit, modifikimit, leximit të sistemit dhe për të prodhuar statistika;
b) Specialistët me detyra monitoruese të Ministrisë së Drejtësisë dhe të Drejtorisë së Përgjithshme të Përmbarimit kanë të drejta leximi në ato çështje që ata kontrollojnë;
c) Drejtori i Përgjithshëm i Drejtorisë së Përgjithshme të Çështjeve Rregullatore të Drejtësisë në Ministrinë e Drejtësisë dhe drejtori i Përgjithshëm i Drejtorisë së Përgjithshme të Përmbarimit ka të drejtë leximi në të gjitha çështjet e përmbarimit shtetëror dhe të drejtën për të prodhuar statistika;
ç) Drejtori i Përgjithshëm i Drejtorisë së Përgjithshme të Çështjeve Rregullatore të Drejtësisë në Ministrinë e Drejtësisë ka të drejtë leximi në të gjitha çështjet e përmbarimit privat dhe të drejtën për të prodhuar statistika;
d) Prokurori ose çdo organ tjetër, që ligji i njeh të drejtën për të pasur akses, ka të drejtë leximi në të gjitha çështjet e përmbarimit shtetëror dhe në të gjitha çështjet e përmbarimit privat;
dh) Kryetari i Zyrës Rajonale ka të drejtë të regjistrojë një çështje në sistem, të hedhë shortin, të zëvendësojë përmbaruesin e zyrës përkatëse, të transferojë çështjen në një zyrë tjetër, të drejtë leximi në të gjitha çështjet e zyrës së tij, të drejtën për të prodhuar statistika dhe ka të njëjtat të drejta me një përmbarues kur ai/ajo është përgjegjës për çështjen;
e) Përmbaruesi shtetëror ka të gjitha të drejtat e nevojshme për përpunimin e çështjeve që i janë përcaktuar dhe të drejta leximi vetëm për çështjet që i takojnë;
ë) Përmbaruesi privat ka të gjitha të drejtat e nevojshme për regjistrimin dhe përpunimin e çështjeve që ai ka marrë përsipër;
f) Përmbaruesi gjyqësor, shtetëror ose privat, përjashtimisht, për çdo procedurë me objekt “Ekzekutim detyrimesh në të holla” ka të drejta leximi të të dhënave parësore, të përcaktuara në shkronjën “a”, të pikës 4, të këtij vendimi.
10. Të gjitha subjektet, që kanë akses në bazën të dhënave ALBIS, marrin masa organizative dhe teknike të përshtatshme për të mbrojtur të dhënat personale nga shkatërrime të paligjshme ose aksidentale, si dhe nga humbje aksidentale, për të mbrojtur aksesin ose përhapjen nga persona të paautorizuar, si dhe nga çdo formë tjetër e paligjshme përpunimi, në përputhje me legjislacionin në fuqi për mbrojtjen e të dhënave personale.
11. Afati i ruajtjes së të dhënave në bazën e të dhënave ALBIS është, si më poshtë vijon:
a) Ruhen në ruajtje të përhershme të dhënat mbi:
i. regjistrat e çështjeve përmbarimore të regjistruara deri në datën e hyrjes në fuqi të këtij vendimi, si dhe të çështjeve përmbarimore të reja, që paraqiten për ekzekutim pas hyrjes në fuqi të këtij vendimi;
ii. përmbaruesin ose zyrën përmbarimore;
iii. numrin dhe datën e regjistrimit të çështjes;
iv. të dhënat identifikuese të qytetarëve dhe subjekteve;
v. numrin dhe datën e vendimit të gjykatës;
vi. numrin dhe datën e urdhrit të ekzekutimit;
vii. llojin e detyrimit;
viii. lojin e taksës ose të tarifës;
ix. statusin e çështjes përmbarimore;
x. numrin dhe datën e vendimit të pushimit të ekzekutimit;
xi. transferimin e çështjeve;
xii. komentet.
b) Dosjet dhe çdo dokument tjetër i prodhuar nga përmbaruesi për çështjet përmbarimore të ekzekutuara tërësisht apo të pushuara sipas parashikimeve në fuqi të Kodit të Procedurës Civile ruhen për një afat 10-vjeçar (dhjetëvjeçar) nga dita e përfundimit të procedurës së ekzekutimit ose nga dita e pushimit të ekzekutimit.
12. Agjencia Kombëtare e Shoqërisë së Informacionit, si autoriteti rregullator koordinues i bazave të të dhënave shtetërore, regjistron, auditon dhe koordinon ndërveprimin me bazat e të dhënave shtetërore.
13. Rregullorja për administrimin, organizimin, funksionimin e brendshëm të bazës të të dhënave të ALBIS, si dhe procedurat përkatëse miratohen me urdhër të ministrit të Drejtësisë, në përputhje me rregullat e parashikuara nga legjislacioni në fuqi për bazat e të dhënave shtetërore.
14. Përmbaruesit gjyqësorë shtetërorë dhe privatë, brenda gjashtë muajsh nga hyrja në fuqi e këtij vendimi, përfundojnë hedhjen e të dhënave në bazën e të dhënave ALBIS, për të gjitha çështjet përmbarimore që kanë në administrim, sipas shkronjave “a” e “b”, të pikës 2, të këtij vendimi.
15. Të dhënat e mbledhura në zbatim të vendimit nr.443 datë 16.6.2011, të Këshillit të Ministrave, “Për krijimin, regjistrimin, mënyrën e funksionimit, të administrimit e të ndërveprimit dhe për sigurinë e Sistemit të Menaxhimit Elektronik të Çështjeve të Përmbarimit Gjyqësor”, i ndryshuar, konsiderohen të mbledhura dhe përpunohen sipas këtij vendimi.
16. Vendimi nr.443, datë 16.6.2011, i Këshillit të Ministrave, “Për krijimin, regjistrimin, mënyrën e funksionimit, të administrimit e të ndërveprimit dhe për sigurinë e Sistemit të Menaxhimit Elektronik të Çështjeve të Përmbarimit Gjyqësor”, i ndryshuar, shfuqizohet.
17. Ngarkohen Ministria e Drejtësisë, Drejtoria e Përgjithshme e Përmbarimit, Dhoma Kombëtare e Përmbaruesve Gjyqësorë Privatë, Agjencia Kombëtare e Shoqërisë së Informacionit, si dhe përmbaruesit gjyqësorë shtetërorë dhe privatë për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
MIRATIMIN E LLOJEVE TË SHËRBIMEVE SHTESË QË OFRON POLICIA E SHTETIT DHE TARIFAVE TË PAGESËS PËR PERSONAT JURIDIKË E FIZIKË, PUBLIKË OSE PRIVATË
Në mbështetje të nenit 100 të Kushtetutës dhe të nenit 81, të ligjit nr.108/2014, “Për Policinë e Shtetit”, të ndryshuar, me propozimin e ministrit të Brendshëm, Këshilli i Ministrave
V E N D O S I:
1. Policia e Shtetit ofron shërbime shtesë kundrejt pagesës për persona juridikë e fizikë, publikë ose privatë, në bazë të kërkesës së tyre, për:
a) mbështetje në zhvillimin e aktiviteteve kulturore, kombëtare dhe ndërkombëtare, si: panaire, ekspozita, teatro, koncerte, shfaqje, festivale të ndryshme, në mjedise të hapura dhe të mbyllura publike, si dhe gjatë zhvillimit të aktiviteteve sportive kombëtare dhe ndërkombëtare, në rastet kur organizatorët e këtyre aktiviteteve nuk janë pajisur me vërtetim sigurie nga Policia e Shtetit, sipas përcaktimeve të ligjit nr.19/2016, “Për masat shtesë të sigurisë publike”, me sigurimin fizik privat, për të ruajtur sigurinë brenda perimetrit të zhvillimit të aktivitetit;
b) vënien në përdorim të uniformës së Policisë së Shtetit, armëve me fishekë manovre, pajisjeve të tjera, mjeteve të loguara policore dhe ambienteve, në fushën e kinematografisë, gjatë zhvillimit të xhirimeve filmike;
c) shoqërimin e automjeteve që transportojnë mallra të rrezikshme, në rastin e kushteve shtesë të sigurisë, sipas ligjit nr.118/2012, “Për transportin e mallrave të rrezikshme”, e të mjeteve jashtë norme dhe transporteve në kushtet jonormale, sipas përcaktimeve të neneve 10, 61 dhe 62, të Kodit Rrugor të Republikës së Shqipërisë;
ç) ruajtjen dhe sigurimin e përkohshëm për një periudhë deri në 3 (tre) muaj ndaj personave juridikë publikë me rëndësi strategjike, aktiviteti i të cilëve vlerësohet në rrezik, si dhe ndaj personave juridikë privatë që kanë përfituar statusin “Investim/investitor strategjik, procedurë e veçantë”, sipas ligjit nr.55/2015, “Për investimet strategjike në Republikën e Shqipërisë”, të ndryshuar.
2. Tarifa për shërbimet e parashikuara në pikën 1, të këtij vendimi, është sipas lidhjes nr.1, që i bashkëlidhet këtij vendimi dhe është pjesë përbërëse e tij.
3. Subjektet juridike e fizike, publike ose private, që kanë nevojë për shërbime policie shtesë, paraqesin kërkesë të argumentuar on-line nëpërmjet portalit unik qeveritar “e-albania”, jo më vonë se tri ditë përpara datës së shërbimit të kërkuar. Pas vlerësimit të kërkesës, brenda 48 (dyzet e tetë) orëve, subjektit i kthehet përgjigje on-line nëpërmjet portalit unik qeveritar “e- Albania” për miratimin ose refuzimin e kërkesës dhe i dërgohet kontrata e ofrimit të shërbimit, e cila nënshkruhet nga titullari i njësisë shpenzuese, që ofron shërbimin.
4. Të ardhurat, që realizohen nga kryerja e shërbimeve shtesë të përcaktuara në këtë vendim, përdoren në masën 90% nga Drejtoria e Përgjithshme e Policisë së Shtetit dhe trajtohen si të ardhura jashtë limitit me qëllim përdorimin e tyre për të përballuar mbulimin e shpenzimeve të kryera për ofrimin e shërbimit, sipas këtij vendimi, dhe 10% derdhen në buxhetin e shtetit. Këto të ardhura nuk mund të përdoren në asnjë rast për shpërblim.
5. Ngarkohen Ministria e Brendshme dhe Drejtoria e Përgjithshme e Policisë së Shtetit për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
K R Y E M I N I S T R I
EDI RAMA
***
V E N D I M
PËR
SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA PROJEKTI “SISTEMIMI I HAPËSIRAVE PUBLIKE DHE PARKIM, LAGJJA E RE, BLLOKU PAS ISH-BASHKISË PATOS”
Në mbështetje të nenit 100 të Kushtetutës dhe të neneve 5, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, me propozimin e Zëvendëskryeministrit dhe ministër i Infrastrukturës dhe Energjisë, Këshilli i Ministrave
V E N D O S I:
1. Shpronësimin, për interes publik, të pronarëve të pasurive të paluajtshme, pronë private, që preken nga projekti “Sistemimi i hapësirave publike dhe parkim, lagjja e re, blloku pas ish-Bashkisë Patos”.
2. Shpronësimi bëhet në favor të Bashkisë Patos.
3. Pronarët e pasurive të paluajtshme, pronë private, që shpronësohen, kompensohen në vlerë të plotë, sipas masës përkatëse që paraqitet në tabelën që i bashkëlidhet këtij vendimi, për pasuritë e llojit “truall” dhe “ndërtesë”, me një vlerë të përgjithshme prej 3 490 235.1 (tre milionë e katërqind e nëntëdhjetë mijë e dyqind e tridhjetë e pesë pikë një) lekësh.
4. Vlera e përgjithshme e shpronësimit, prej 3 490 235.1 (tre milionë e katërqind e nëntëdhjetë mijë e dyqind e tridhjetë e pesë pikë një) lekësh, përballohet nga Bashkia Patos.
5. Vlera e shpenzimeve procedurale, në masën 50 000 (pesëdhjetë mijë) lekë, përballohet nga Bashkia Patos.
6. Shpronësimi fillon menjëherë pas botimit të këtij vendimi në “Fletoren zyrtare” dhe afati i përfundimit të shpronësimit është brenda 3 (tre) muajve nga data e hyrjes në fuqi të tij.
7. Pronarët e pasurive të paluajtshme, pronë private, të pasqyruar në tabelën bashkëlidhur këtij vendimi, kompensohen, për efekt shpronësimi, pasi të kenë paraqitur dokumentacionin justifikues për likuidim pranë Bashkisë Patos.
8. Bashkia Patos kryen procedurat për likuidimin e pronarëve të shpronësuar, sipas përcaktimeve të bëra në këtë vendim.
9. Afati i fillimit dhe i përfundimit të punimeve është në përputhje me afatet e parashikuara nga Bashkia Patos.
10. Agjencia Shtetërore e Kadastrës pezullon të gjitha transaksionet me pasuritë e shpronësuara deri në momentin e realizimit të procesit të hedhjes së gjurmës së projektit mbi hartën kadastrale të regjistrimit dhe regjistrimit të aktit të kalimit të pronësisë në favor të Bashkisë Patos për pasuritë e shpronësuara.
11. Agjencia Shtetërore e Kadastrës, brenda 30 (tridhjetë) ditëve nga data e miratimit të këtij vendimi, nis procedurat për hedhjen e gjurmës së projektit mbi hartën kadastrale, sipas planimetrisë së shpronësimit të miratuar, dhe regjistron aktin e kalimit të pronësisë për pasuritë e shpronësuara në favor të Bashkisë Patos.
12. Ngarkohen Ministria e Infrastrukturës dhe Energjisë, Bashkia Patos, Agjencia Shtetërore e Kadastrës dhe Agjencia Shtetërore për Shpronësimin për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
KRYEMINISTRI
EDI RAMA
***
V E N D I M
PËR
SHPRONËSIMIN, PËR INTERES PUBLIK, TË PRONARËVE TË PASURIVE TË PALUAJTSHME, PRONË PRIVATE, QË PREKEN NGA PROJEKTI “NDËRTIMI I HIDROCENTRALIT “GRABOVA 2” MBI PELLGUN UJËMBLEDHËS TË PËRROIT TË GRABOVËS, DEGË E LUMIT TË DEVOLLIT, NË QARKUN ELBASAN”
Në mbështetje të nenit 100 të Kushtetutës dhe të neneve 5, 20 e 21, të ligjit nr.8561, datë 22.12.1999, “Për shpronësimet dhe marrjen në përdorim të përkohshëm të pasurisë, pronë private, për interes publik”, të ndryshuar, me propozimin e Zëvendëskryeministrit dhe ministër i Infrastrukturës dhe Energjisë, Këshilli i Ministrave
V E N D O S I:
1. Shpronësimin, për interes publik, të pronarëve të pasurive të paluajtshme, pronë private, që preken nga projekti “Ndërtimi i hidrocentralit “Grabova 2” mbi pellgun ujëmbledhës të përroit të Grabovës, degë e lumit të Devollit, në Qarkun Elbasan”.
2. Shpronësimi bëhet në favor të shoqërisë koncesionare “H.K HEC Grabova 2”, sh.p.k.
3. Pronarët e pasurive të paluajtshme, pronë private, që shpronësohen, kompensohen në vlerë të plotë, sipas masës përkatëse, që paraqitet në tabelën bashkëlidhur këtij vendimi, për pasuritë e llojit “tokë arë”, me një vlerë të përgjithshme prej 355 395 (treqind e pesëdhjetë e pesë mijë e treqind e nëntëdhjetë e pesë) lekësh.
4. Vlera e përgjithshme e shpronësimit, prej 355 395 (treqind e pesëdhjetë e pesë mijë e treqind e nëntëdhjetë e pesë) lekësh, përballohet nga shoqëria koncesionare “H.K HEC Grabova 2”, sh.p.k.
5. Vlera e shpenzimeve procedurale, në masën 50 000 (pesëdhjetë mijë) lekë, përballohet nga shoqëria koncesionare “H.K HEC Grabova 2”, sh.p.k.
6. Shpronësimi fillon menjëherë pas botimit të këtij vendimi në “Fletoren zyrtare” dhe afati i përfundimit të shpronësimit është brenda 3 (tre) muajve nga data e hyrjes në fuqi të tij.
7. Pronarët e pasurive, pronë private, të pasqyruar në tabelën, që i bashkëlidhet këtij vendimi, kompensohen, për efekt shpronësimi, pasi të kenë paraqitur dokumentacionin justifikues për likuidim pranë shoqërisë koncesionare “H.K HEC Grabova 2”, sh.p.k.
8. Shoqëria koncesionare “H.K HEC Grabova 2”, sh.p.k., kryen procedurat për likuidimin e pronarëve të shpronësuar, sipas përcaktimeve të bëra në këtë vendim.
9. Afati i fillimit dhe i përfundimit të punimeve është në përputhje me afatet e parashikuara në kontratën e koncesionit.
10. Agjencia Shtetërore e Kadastrës, Zyra Vendore Gramsh, brenda 30 (tridhjetë) ditëve nga data e miratimit të këtij vendimi, në bashkëpunim me shoqërinë koncesionare “H.K HEC Grabova 2”, sh.p.k., nis procedurat për hedhjen e gjurmës së projektit mbi hartën kadastrale, sipas planimetrisë së shpronësimit të miratuar, dhe regjistron aktin e kalimit të pronësisë për pasuritë e shpronësuara në favor të shtetit, përfaqësuar nga Ministria e Infrastrukturës dhe Energjisë.
11. Agjencia Shtetërore e Kadastrës, Zyra Vendore Gramsh, pezullon të gjitha transaksionet me pasuritë e shpronësuara deri në momentin kur do të realizohen procesi i hedhjes së gjurmës së projektit mbi hartën kadastrale të regjistrimit dhe regjistron aktin e kalimit të pronësisë për pasuritë e shpronësuara në favor të shtetit, përfaqësuar nga Ministria e Infrastrukturës dhe Energjisë.
12. Ngarkohen Ministria e Infrastrukturës dhe Energjisë, Agjencia Shtetërore për Shpronësimin, shoqëria koncesionare “H.K HEC Grabova 2”, sh.p.k., Agjencia Shtetërore e Kadastrës, Zyra Vendore Gramsh, si dhe Drejtoria e Administrimit dhe Mbrojtes së Tokës pranë Këshillit të Qarkut Elbasan për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
KRYEMINISTRI
EDI RAMA